ალექსანდრე აქუარიუსი - ადამიანი, რომლის ხელშიც ქართული დამწერლობა ხელახლა იბადება

ქართულ დამწერლობასთან განსაკუთრებული სიყვარული აკავშირებს. ლამაზი ხელწერა ხელოვნებაში გადაზარდა და საკუთარი თავი შექმნა. ალექსანდრე აქუარიუსი, იგივე ალექსანდრე მამუკაშვილი გორელი კალიგრაფი და კალიგრამისტია. არ იცის, უბრალოდ ხატვით წერს, თუ წერით ხატავს, თუმცა ერთი რამ ცხადია - მის ხელში ქართული დამწერლობა ახლიდან იბადება. ალექსანდრე მხატვარიცაა, თუმცა კალიგრაფიაში ემოციების გამოხატვის ახალი გზა იპოვა, გზა, რომელსაც ჩვენ ახლა გიჩვენებთ. 

ალექსანდრე აქუარიუსი: წერა დედამ მასწავლა, როცა 3 წლის ვხდებოდი და დასაწყისშივე ყურადღებას ვაქცევდი წერის ესთეტიკას და ყოველი უშნოდ დაწერილი ასო ხასიათს მიფუჭებდა. როცა სკოლაში მივედი, იქაც ყველა კალიგრაფიას მიქებდა - გოგონებზე ლამაზადაც კი წერო და ასე მემატებოდა მოტივაცია, დროთა განმავლობაში უბრალოდ ლამაზი ხელწერა ხელოვნებაში გადავიყვანე. ამას დაემატა კალიგრაფიის კონკურსები, რაც ყველაზე მნიშვნელოვანი ბიძგი აღმოჩნდა ჩემი, როგორც კალიგრაფის ჩამოყალიბებაში.

- თითოეული ადამიანი ემოციების ჭურჭელია. ალბათ მხატვრებს, მუსიკოსებს, მწერლებს და ა.შ. ყველაზე მეტად გაუმართლათ, რადგან შემოქმედება ამ ემოციებისგან დაცლის ყველაზე ლამაზი, გულწრფელი, შთამბეჭდავი გზაა. მხატვარიც ვარ, თუმცა კალიგრაფის ამპლუაში დამატებითი, სრულიად განსხვავებული სადინარი იხსნება ემოციებისთვის, გზა, რომელზეც მხოლოდ მხატვრობა ვერ გაგატარებს.

- მე კალიგრამისტიც ვარ. (კალიგრამა - ტექსტი, რომელიც გრაფიკულად ნახატს ქმნის). ამ ხელოვნებაში ასოები პლასტიკური უნდა იყოს, ქართული დამწერლობა ერთ-ერთი უპირველესია ამ მხრივაც, მისი მოქნილობა და მრგვალი ფორმები ერთგვარი ფუფუნებაა საინტერესო კალიგრამის შესაქმნელად.

- დიახ, კალიგრაფიის პირველი კონკურსი, რომელშიც გავიმარჯვე, მშობლიურ ქალაქ გორში ჩატარდა, შემდეგ გაცილებით დიდი მასშტაბის კონკურსი ხელნაწერთა ეროვნულმა ცენტრმა გამოაცხადა და 4 ნომინაციაში გავიმარჯვე. გაკეთდა გამოფენებიც ეგვიპტის სხვადასხვა ქალაქებში, პერსონალური გამოფენა აბუ დაბიშიც მქონდა. არაბული სამყარო განთქმულია კალიგრაფიული სკოლით, ძალიან მოსწონთ ქართული კალიგრაფია. მაქვს წერის საკუთარი ტექნიკა და, ალბათ თავისთავად თვალშისაცემია. გაყიდული ნამუშევრებიდან უმეტესად უცხოელები არიან მფლობელები, რომლებიც ფეისბუქით მიკავშირდებიან.

- ჩემს სავიზიტო ბარათად კალიგრამის ხელოვნება იქცა. ამ შემთხვევაში შთამაგონებელი შეიძლება ლექსი, პროზა ან უბრალოდ ფრაზა იყოს, შემდეგ მინდება ლექსის გამოსახვა ნახატით, რომელიც სწორედ ამ ლექსს შეიცავს. კალიგრამის ხელოვნებას სწორხაზოვნად არ მივყვები, აქაც არაერთ მიმართულებას ვავითარებ.
საბოლოოდ, თავადაც არ ვიცი, ხატვით ვწერ თუ წერით ვხატავ.

- ემოციური კავშირი არამგონია, მაგრამ განსაკუთრებით მიყვარს სამრეგისტრიანი და დატვირთული ასობგერების წერა, რადგან საშუალებას იძლევა, რომ იყო მეტად შემოქმედებითი. „რ" ჩემი ფავორიტია, ყველაზე ნაკლებად „ნ"-ს წერა მომწონს, რატომღაც.

- ჯერ-ჯერობით ვერაფერს ვიტყვი გეგმებზე, საკმაოდ ხანგრძლივი პაუზა მაქვს შემოქმედებაში, რაც, როგორც წესი, რაღაც კარგის ნიშანია, ვგულისხმობ, რომ ხანგრძლივ შემოქმედებით მიქცევას უფრო ძლიერი მოქცევა მოყვება, იმედია ცუნამის რანგის. შემოდგომა დიდ როლს თამაშობს ჩემს პროდუქტიულობაში.